ഗൾഫ് രാജ്യങ്ങളിൽ ദീർഘകാലം താമസിക്കാൻ ആഗ്രഹിക്കുന്നവർക്ക് സുവർണാവസരം. ജിസിസി രാജ്യങ്ങളിൽ എവിടെയും ദീർഘകാല താമസത്തിനുള്ള ഗോൾഡൻ വിസ സ്വന്തമാക്കാനുള്ള അവസരമാണ് ലഭിക്കുന്നത്. നിലവിൽ യുഎഇയിൽ താമസിക്കുന്നവർക്കാണ് ഈ അവസരം ലഭിക്കുന്നത്.
മറ്റു ഗൾഫ് രാജ്യങ്ങളിൽ താമസിക്കുന്നവർക്ക് അതത് രാജ്യങ്ങളിലെ ഗോൾഡൻ വിസയാണ് ലഭിക്കുക. എന്നാൽ യുഎഇയിൽ താമസിക്കുന്നവർക്ക് ഏത് രാജ്യത്തെ ഗോൾഡൻ വിസ വേണമെങ്കിലും സ്വന്തമാക്കാം. വേറൊരു രാജ്യത്തിന്റെ ഗോൾഡൻ വിസ സ്വന്തമാക്കണമെങ്കിൽ താമസിക്കുന്ന രാജ്യത്തിന്റെ അനുമതി വേണം. ഇവിടെയാണ് യുഎഇയിൽ താമസിക്കുന്നവർക്ക് മറ്റേത് രാജ്യത്തിന്റെയും ഗോൾഡൻ വിസ സ്വന്തമാക്കാനുള്ള അവസരം ലഭിച്ചിരിക്കുന്നത്.
ഗോൾഡൻ വിസ സ്വന്തമാക്കുന്നവർക്ക് പ്രാദേശികമായ ഒരു സ്പോൺസർ ഇല്ലാതെ ജിസിസി രാജ്യങ്ങളിൽ താമസിക്കാനും ജോലി ചെയ്യാനും നിക്ഷേപം നടത്താനും സാധിക്കും. അഞ്ച് മുതൽ 10 വർഷം വരെയാണ് വിസയുടെ കാലാവധി. യുഎഇയിലാണ് ദീർഘകാല താമസത്തിന് ഗോൾഡൻ വിസ നൽകുന്ന രീതി ആരംഭിച്ചത്. പിന്നാലെ മറ്റ് രാജ്യങ്ങളും ഗോൾഡൻ വിസയുമായി രംഗത്തെത്തുകയായിരുന്നു.
2019 ജൂണിലാണ് യുഎഇ ഗോള്‍ഡന്‍ വിസ വിതരണം ആരംഭിച്ചത്. യുഎഇ വൈസ് പ്രസിഡന്റും പ്രധാനമന്ത്രിയുമായ ശൈഖ് മുഹമ്മദ് ബിന്‍ റാഷിദിന്റെ പ്രഖ്യാപനത്തിന് പിന്നാലെയായിരുന്നു ഗോൾഡൻ വിസ വിതരണം തുടങ്ങിയത്. ഉയര്‍ന്ന ആസ്തിയുള്ള നിക്ഷേപകരെ ലക്ഷ്യമിട്ടാണ് പദ്ധതി തുടങ്ങിയത്. പിന്നാലെ വിവിധ മേഖലകളിലെ പ്രതിഭകള്‍, ഗവേഷകര്‍, മികച്ച വിദ്യാര്‍ത്ഥികള്‍, വിദേശരാജ്യങ്ങളിലെ സെലിബ്രിറ്റികൾ എന്നിവരും ഗോൾഡൻ വിസയ്ക്ക് അർഹരായി. ഇതോടെ ഗോള്‍ഡന്‍ വിസ ലഭിച്ചവരുടെ എണ്ണം കുതിച്ചുയരുകയും ചെയ്തു.
Content Highlights: UAE residents can now get Golden Visas across the GCC